د. مراد علمي
مظاهرات، حتجاجات! ما مشاوْا حتى طـيــّـحـوا الإسلانديين الشرفاء رئيس حكومتهم، لأن بالنسبة ليهم اللي كايربح فلوس المواطنين فى بـلاد معينة ضروري يستثمر فلوسو فاين ربحهم، ماشي إهــرّبهم بحال أباطرة الكوكايين، المجرمين أو المحتالين، هادا ما كايدل ّ غير على حسّ عالي كايجمع جميع الشعوب أو بأنه ما كاين حتى شي فرق بين أولاد شعب واحد، كيف ما كان منصبـو، يعني ضروري ما إكون حتى شي حـدّ فوق القانون، إلا ّ أو كانتلفــّـظوا بمفردات ما عندهم حتى شي معنى ولا ّ "طـُـعم"، أو غير عبارة على "ﮔــوزة خاوية".
الدرس المهم اللي يمكن لينا نـستنتجوه من "باناما بيبرس" هي أن الصحافة الشريفة قايمة بعملها على أحسن وجه، لأنه شتاغلوا فى تكـتــّـم كثر من 400 صحفى فى كثر من 80 دولة أو عام كـولـــّـو على تقريبا 11 مليون ملف إليكتروني.
كانحيــّـي الصحافة الحرة اللي كاتنوّر الرأي العام باش نزيدوا ألــّـقدام، أمــّـا الأحزاب السياسية ديالنا، ما عندنا ما نديروا بيها، هي بنفسها طرف من المشكل، حتى هادوا اللي بغاوْا يعطيوْنا دروس فى محاربة الفساد، الأخلاق أو "الأيادي النظيفة"، يدّيهم أوسخ من أباطرة المخدرات أو يدينّ الســّـكايرة، لأن اللي كايشرب داخل سوق راسو، كايضربها بسركرة، غير كايحس ّ برجليه بداوْا كايخونوه، كايمشي ألــْـضارو باش إضـربها بنعسة.
أمــّـا هادوا ساحيين، مقـصــّـحين وجهم، كايقتارحوا علينا نزوروا أهلنا فى عطلة الصيف أو نـزيــّـروا الصــّـمطة أو هوما كايمشيوْا ألأروبا، هاربين من قــُـرصات شمس جوييا أو غشت المسمومة، سامحين ألــْـنفسهم معاشات خيالية من مال الشعب، من شعب مفقــّـرينـو، يمكن لينا نعتابروا الإسلام السياسي من أخطر الأنظمة السياسية الشمولية على وجه الأرض، لأنه كايخدّر، كايحشّش قلوبة أو عقولة الطيبين بالدين، أو شكون غادي يتجرأ أو إقول أن الدين طاعـون؟ الدين الإسلامي، دين التسامح ، اللي بغاه، أو بلاصتو الطبيعية فى الجـّـوامع، ماشي فى سوق الـدّلالة فاين كايستعملوه "أمــّـالين سوارت الجنة أو جهنم"، يا حسرة، بحال شي جمل مدوّزين ليه خرصة فى منخارو، ضروري فصل الدين على السياسة، إلا ّ أو تـعـفـــّــنـوا بجوج.
ضروري نحتافلوا بهاد النهار أو ما عمـّـرنا ننساوْا 3 أبريل 2016، نهار عرّات الصحافة الحرة على عورة شحال من ملك، رئيس دولة، مجرم، حاكم مطلق، شفـّـار، محتال، دجال، العجيب فى الأمر هو كيفاش هاد مكتب المحامات المختص فى تهريب الفلوس من الضرائب قـدّ يفتح، إأسس شركات وهمية فاق عددها كثر من 000 200 شركة، لازم نعرفوا أنه غير فى إفريقيا كثر من 900 مليار دولار مخرّجة من القارة بطرق ملتوية، أما فى العالم بأسره كثر من 10 تريليون دولار مهرّبة.
أو حسب عقلية، مزاج صحاب النفوذ، لا من ملوك، رؤساء دول ولا ّ أثرياء، ضروري على الصغار، على الحيط القصير إدفع الضرائب، هاكدا كاتخمـّـم هاد النخبة الإنتهازية اللي ما عندها لا أخلاق، لا ضمير، ما كاتبقاش فى المظاهر، ولاكن فى الأفعال، أمــّـا تصلـّـي خمسة ديال المرات فى النهار أو تهـرّب ثروتك ألــْـجـنــّـات ضريبية، هادي أعمال غير شريفة، ضمن هاد الائحة كاين ملك السعودية، سلمان بن عبد العزيز اللي واردة سميــّـتو فى ملف بتاريخ 2008، فاين مالك أسهم فى شركة فى لوكسنبورك سميتها "شاف كوبوريشين"، مراتو اللولة اللي ماتت، خمسة ديال أولادو أو بنتو هوما اللي مالكين هاد الشركة، أو هاد الشركة كانت كاتملك أسهم فى 4 شركات وهمية خرى، فى ملف آخور من سنة 2015 غادي نقراوْا أن سلمان بن عبد العزيز هو المستفيد الأساسي من "ياخت م/ي أركا"، كاتحمل راية بريطانية أو فى ملك شركة سميتها "كراسوس ليميتيد" اللي تأسسات فى "جزر العذراء"، كاين حتى رئيس دولة الإمارات العربية، خليفة بن زايد النهيان، اللي على حساب تسريبات "باناما بيبارس" كايملك كثر من 30 شركة وهمية اللي فتح مكتب المحامات "مونساك فونسيكا" فى صالحو أو اللي فى الأصل هو المستفيد اللول، ولاكن كذالك مراتو أو أولادو، كاين بشار الأسد، الملك خوان كارلوص، رئيس دولة أوكراينة، أمير قطر السابق، أحمد الميرغاني، رئيس السودان السابق، لاصانا كونتي، رئيس غينيا السابق، رئيس دولة الأرجنتين، رئيس دولة أزاربايدجان، صحاب بوتين، أولاد رئيس الدولة الباكيستانية، ولد رئيس الدولة المالايزية، ولد حسني مبارك إلخ من الألوف من المواطنين العاديين، المشاهر، المجرمين، باطرونات الكوكايين أو سرّاقين الضرائب اللي مخبعين فلوسهم فى جنات ضريبية.
أو ليومنا هادا باقي مكتب المحامات "موساك فونسيكا" كايعرض خدماتو الإجرامية على كل واحد بغى إهـرّب فلوسو ولا ّ إخـّـبعهم على وزارة المالية ديال بلادو، ما عجبني غير برلماني أوربي لما تنكـّـر أو ضرب التليفون ألــْـهاد مكتب المحامات، قال ألــّــموظفة: "عندي جوج مليون أو نص أورو (تقريبا: 2 مليار أو نص سانتيم) باغي نهرّبها، ولاكن من المحتمل تكون فلوس موسـخــّة"، ردّات عليه الموظفة: "ما كاين مشكل، فلوسك فى الأمان، غير دوز عندنا باش نوقعوا العقد"، ضروري سن قوانين كاتجرم تهريب الأموال أو خلق شركات وهمية فى الخارج قصد التهرب من دفع الضرائب، إلا ّ أو كاين مغاربة عايشين فى أوسطنا كايعتابروا القوانين كاطــّـبق غير على الصغار، أمــّـا الكبار إعملوا اللي بغاوْا، يعني هوما غير معنيين بقوانين البلاد فاين جناوْا هاد الأرباح كولــّـها، يعني كاتكول خيرنا أو تخدم غيرنا.
من الازم نشير أن من حق كول ّ واحد يفتح حساب فاين أمـّـا بغى، هاد الشي كايدخول فى إطار الحريات الفردية اللي يمكن لينا نعتابروها قيمة أساسية أو من "إحدى ثوابت اللعبة الديمقراطية"، ولاكن باش تحل حسابات فى شركات وهمية، هادا ما كايدل ّ غير على شي حاجة ماشي فى صالحك، باغي تخبــّـيها، يمكن لينا نعتابروا تسريبات "باناما بيبارس" ضربة موجعة بالنسبة للنخبة السياسية صاحبة البلاغات أو اللسان المقسوم على جوج، لبس الجلا ّبة أو الطربوش، بحال أيها الناس، قول ألــْـهادا اللي بغى يسمع، ولاكن عمل غير اللي فى فراسك، النخبة السياسية ولا ّ اللي كايلهطوا مورى المال، هاجسهم الوحيد هي المصالح الشخصية، أمـّـا الإسهام فى تمويل مشارع خاصة بـالشأن العام، الله إجيب! جميع المشارع الكبيرة اللي كانسمعوا أو اللي حاملة "استثمارات أجنبية" الشعب المغربي اللي كايموّلها عن طريق الضرائب المباشرة أو غير المباشرة، مثلا "محطة نور ديال الطاقة الشمسية"، غير بانكة ألمانية ديال الدولة عطات ألــّـمغرب قرض فاق 800 مليار سانتيم أو اللي بقى كايتسال كايـكمـّـلوه الأبناك المغربية اللي فى الأصل ماشي فلوسهم ولاكن فلوس الشعب المغربي أو المهاجرين المغاربة اللي كايضربوا تمارة باش إعوّلوا عائلاتهم فى المغرب، هاكدا كايضمنوا الأمن الغذائي لكثر من 20 فى الميا ديال المغاربة أو المغربيات، جميع البلاغات الخاصة بالإستثمارات الأجنبية الكبيرة حنا اللي كاندفعوا فلوسها فى "آخر المطاف"، فى هاد الدنيا ما كاينش اللي غادي يتبرّع عليك بلا أي مقابل، السعودية باغية تعطينا 230 مليون دولار، زعما غير هاكداك؟ أبدا! زايدون، حنا ما بغينا صدقة من حدّ، غير تعليم راقي بلوغتنا الحية ديال كول ّ نهار باش نسخـّـورا جميع طاقاتنا البشرية، أمـّـا النخبة بان عـيـبــها.
