د. مراد علمي
تأثير الفكر الـدّاعشي، يعني الإسلام السياسي، ما فيه شك، هو مول هاد المصايب، لأن اللي قام بهاد الأعمال الشنيعة إمـّـا حمق ولا ّ تحشـّـش بفكر الدعاوْشى، أكيد ماشي مسلم ملتزم هاد "بوهلال" كيف كتاشفنا، ولاكن التربية أو كثرة الفيديوهات دال داعش أو اللي ملـقــّـم عليهم هي اللي دوّخاتـو، لـَـعـبات ليه بـعـقــلـو، صباعو حتى دخل فى الناس بالكاميـيون.
ما حـدّنا ما فصلناش الدين على السياسة إلا ّ أو بقينا كاندورا فى الخـوى، أو الإسلام السياسي غادي ديما يبقى على شكلو، عنصري، شمولي، قـتــّـال، فـتـــّـاك، سـفــّـاك، ما كايعرف غير لغة التهديد أو القتيلة، لأن اللي معاه الله أو الرسول ما كايخـطئش، يا حسـرة! فضايح، مصايب الإسلام السياسي معروفة أو مفضوحة، ديما غادي يقتل الأبرياء، ماشي غير فى الجزائر، تونس، بغداد، اليمن، السودان، ليبيا، السعودية ولا ّ سورية، ولاكن حتى فى أوسط أوروبا، قولنا هاد الشي ماشي مرة ماشي جوج، ضروري نفرّقوا بين السياسة أو الإسلام، أو الخلط بيناتهم هادي هي النتيجة ديما، لأن جميع الجماعات الإسلامية، اللي حتى شي وحدة منهم ما كاتـاخـودش بينها أو بين "الجهاد" مسافة، كايحرّضوا على التفرقة أو عدم التسامح، اللي كـايــكـرّر ديـما بأن ما كاين غير المسلم أو الكافـر، هادا كايعرف مزيان بأنه كايحرض بطريقة غير مباشرة على التصفية الجسدية، على القتل العمد.
زايدون ما كاين حتى شي قـنــفـود ملس من لاخور، لازم على جميع الدول الإسلامية إخــلــّـيوْا الدين، الملة أو القرآن فى التـــّـيــساع أو إحلــّـوا مشاكل شعوبهم بلا ما إدوخـلوا فى مسائل ما كاتعنيهمش، ماشي إضحكوا على الشعـب كيف عملات الحكومة المغربية أو تعاملات مع "زبل الطاليان"، الإخوان المغاربة ما عندهم حتى شي حس سياسي، لأنهم مـدّينها غير فى راسهم، أمـّـا الشعـب لـهــْـلا يـقـلب، كون كايموتوا عليه كيف كايكذبوا علينا ما عـمّـرهم يستوردوا الوباء.
قال ليك دابا باغيين لجنة تحقيق باش تدرس هاد الملف، أو علاش قبلتي أصـلا ً تدخول هاد الأزبال؟ النفاق السياسي المغربي، ديما معا الغالبة، السياسة قيم اللي ما عندش دياولنا، المخيـيـّـر فيهم تشريه، بكورسي، السياسي، شريف الأخلاق، الأعمال، غير كايشوف راسـو زبــّـلها، كايستقل، بلا ما إجرّي عليه لا الملك ولا رئيس الحكومة، دياولنا كايحماقواعلى داك الطرف ديال "الخشب" كثر من عيالاتهم ولا ّ أولادهم، آيْ هاي من داك الطرف ديال الخشب كايعملوا خوشيبات، ملـيــيــّـنات، شكون اللي عـرف، ملـيـيــّـرات.
الإسلام ضروري يبقى مسألة شخصية أو ما عمـّـرو يدخل فى قضايا بعيدة عليه، إلا ّ أو وسـّـخناه، عـفـــّــناه، أو الإخوان المسلمين أو اللي كايضور فى فلكهم هوما اللي شوّهوا سمعة المسلمين، الإسلام فى العالم كولــّـو، كايضنوا أنهم كايدافعوا عليه، ولاكن فى الحقيقة خـنــقــوه ب "حـوبــّـهم"، فى العمق أنانـيــين، كايحبـّـوا راسهم كثر من الله ولا ّ النبي محمد ص، لأنه اللي كايبغي الله ولا ّ محمد ص، الإسلام ما كايدخّـلوش ألــْـسوق الـدّلالة، رضـّـو طاسة كايسعى بيه، "صـْـويـيــت ألله آ المومنين، صـْـوييت"، الإسلام السياسي كايشكل خطر على جميع البشرية، على السلام العالمي، لأنه ما كايـتـسامحش أو ما كايعرف غير قـتولني ولا ّ نقـتلك، الإسلام السياسي كلا جميع المجتمعات من الداخل، لأن الإخوان المسلمين أو اللي كايفكر بحالهم باغـيـينهـا كولـّـها، أو هوما المسؤولين اللـوالى على هاد الشي اللي كايطرى باسم الإسلام بطريقة مباشرة ولا ّ غير مباشرة بحال هاد الجريمة ضد الإنسانية اللي عشنا فى نيس الفرانساوية ولا ّ فى دول إسلامية خرى.
الجينرال السيسي، ولو كانعرفوا الإنتهاكات السارخة اللي كايقوم بيها ضد كـولّ واحـد ما فــكــّـرش بحالو ولا ّ عارضو، ما جاش أو سجن مورسي، أمير الإخوان المسلمين، صحاب الإخوان المغاربة، لأنه تآمر على أولاد بلادو أو بغى إخـرّبها أو إردّها بحال الصومال.
لدالك ضروري فصل الدين على تدبير الشأن العام، أو حل كول حزب ربط السياسة بالإسلام، بالدين بحال حزب "العدالة والتنمية"، من اللي جـاوْا ألــّـحكومة أو هوما داخلين فى صراعات مع الشعب المغربي، لدالك الحكومة الماجية خصها تكون " حكومة ائتلاف وطني"، لأن الأحزاب السياسية المغربية كانعرفوا شنو كاتسوى أو الكفاءات اللي كايتوفروا عليها، الأغلبية كولهم غير صنطيحة، فضايح، هضرة خاوية (جوج فرانك، 22 ساعة، البوكير كايقوّي الذاكرة إلخ)، بغينا شرفاء، نبلاء، معـقـــّـلين، ماشي حلايقية، كـذّابة ولا ّ دجـّالة، دائما فى إطار المؤسسة الملكية، خوك، يبقى خوك، إمضغك أو ما عمـّـرو إبلعكش، ماشي بحال الإسلام السياسي اللي باغي يخـنــقــنــا، ياكولنا بـحـوايجـنــا.
