مراد علمي
لحد الآن الأمة المنفاتحة على العالم كانت ديما كاترغب فى الرفاهية الإقتصادية أو خلق توازن بين جميع الفرقاء، الفاعلين، أمـّـا الأمة الشعبوية كاتعيش ديما قلق هوياتي مزمن، ضطرابات قتصادية أو الخوف من التدهور الإجتماعي اللي أكيد دفع شرائح كبيرة من المجتمع المغربي إصوّت على المرجعية الإخوانية بكثرة، لأنه إيلا داق البشر من شر الأفق المسدود، لاين غادي يرجع أو شنو هو المنفد، إيلا ما كانش الدين، الميطافيزيقا؟
على ما كانلاحظ اليوما كاين إقبال كبير على جميع الشعبويين فى العالم، حتى عندنا، لأن بالنسبة لــَـشعبويين جميع المشاكل بسيطة أو يمكن ليها أتــّـحل فى رمش العين، عندنا اليوما نظام جديد، متشبـّـع بالشعبوية أو الإنغلاق على الذات أو الحدود، أو هاد الشي اللي كانعيشوا لا فى أوروبا ولا ّ فى أمريكا، بلونيا، هنكاريا بداوْا أو تبعوهم النكالزا، من بعد من المحتمل فرانسا مع "ماري لوبان" أو حزبها العنصري اللي كانت من اللوالى اللي هنــّـاوْا ترامب بفوزو فى الإنتخابات الميريكانية، أو الديمقراطية ما كاتـنتجش ديما غير الطيب، اللطيف، اللي يستحق ولاكن حتى الوبا أو الكوليرا.
الشعبوية الميريكانية أو الأوربية ما هي غير عملة وحدة، بحال الشعبوية المغربية، كولهم مهووسين بتشكيك مؤسسات الدولة أو حتى الإنتخابات الديمقراطية اللي كايستافدوا منها هوما اللوالى، حتى هيتلر تسلــّـم مفاتح الدولة بطريقة ديمقراطية حتى أتـــّـقلب عليها من بعد أو كان سباب قتيلة
كثر من 50 مليون فرد فى العالم بأسره، الشعبويين عزيز عليهم إلعبوا بالعافية أو إتهموا خصومهم بأبشع الإتهامات، بحال ترامب اللي زعم أن الميكسيكيين كايغتاصبوا العيالات الميريكانيات، المسلمين باغيين إطرطقوا أو إقوموا بإبادة جميع الميريكانيين أو أن الصينيين كايسرقوا مناصب الشغل ألــّـميركانيين، المغزى من هاد الخطاب اللي كايقطر بالحقد، بالكراهية هي سدّ عليك الباب أو طلــّـع الســـّـور باش ما إشوفك حدّ شنو كاتعمل فى دارك ولوْ كانعرفوا أن الميريكانيين هوما اللوالى فى قتيلة بعضياتهم، كثر من 30 آلف كولا ّ عام، فى الصين اللي كايعيوشوا فيها كثر من 1,3 مليار ديال البشر أو ما كاينش هاد الرقم القياسي اللي كايدلّ غير على مجتمع ميريكاني دامي، مريض كولــّـو صراعات عرقية، قتصادية، عقائدية، طبقية.
الشعبويين كايستغلوا وضع شرائح عريضة من المجتمع أو كايوهمهم بأنهم كايـتوفــّـروا على حلول سحرية اللي فى الأصل كولــّـها كذوب، تبوحيط، الخوف من ضياع الهوية هو الوقود الوحيد اللي كايضور فى عروقات جميع التيارات الشعبوية اللي عرفات أطـــّـوع، تجلب حتى الطبقة المتوسطة، لذالك لازم علينا ما نستغربوش إيلا كثير من هاد الطبقة صوّت ألــْـصالح حزب الإخوان فى المغرب، لأن هاد الطبقة عندها اليوما نظرة، حنين ألــّـماضي القريب أو ما كرهاتش تسترجع هوية البارح اللي ضاعت منها عن طريق العولمة أو الإستغناء على اليد العاملة، فى عالم اللي بدا كايركــّـز على الخدمات كثر من على الصناعة التقليدية.
اليوما الصراع قايم بين الأمة المنفاتحة على العالم أو الأمة الشعبوية المنغالقة على نفسها، شكون اللي إفوز فى هاد المنافسة اللي ضروري تبقى ديمقراطية؟ المستقبل هو اللي غادي يحسم، الشعبوية ستاغلات ديما إحباط، غضب الأغلبية الصامتة ولا ّ حتى اللي كاتبدي برييــّـها ضد النخبة الحاكمة اللي كاتسمـّـيها "التحكم"، "الدولة العميقة" ولا ّ "مربع الحكم"، الشعبويين كولــّـهم كايستـغلــّـوا طيبوبة الناخبين أو كايكذبوا عليهم، غادي نوظفوا كثر من 400 آلف كولا ّ عام، ولوْ هوما اللوالى اللي كايصيفطوا الهراوات إينوبوا عليهم إيلا نظــّـموا بعض المحتجين
مظاهرات سلمية كايطالبوا فيها بتفعيل الوعود الإنتخابية، بحال ترامب اللي زعم أن هيلاري كلينطون باغية تطلق جميع السجناء ولا ّ باراك أوباما اللي عرض على 000 250 آلف سوري إيجيوْا ألــْـميريكان، بحال إيلا ميريكان الجنة فوق الآرض أو ما كايـتــــّـقـتـلوش الناس فيها "رميا بالرصاص"، شنو دنبهم؟ لون جلدهم.
جميع الشعبـويين عندهم قاسم مشترك واحد: بارانويا التشكيك، الكذوب! الأدلة، الحجج الدامغة ما بقى عندها حتى شي "طعم"، الإخوان المغاربة كايتكلــّـموا فى هاد الإطار على "المعقول"، أو لحد الآن ما شفنا حتى شي "معقول"، كولــّـشي بقى معلــّـق، لا الوظيفة العمومية، لا الصحة، لا إصلاح التعليم، الإدارة المغربية، حتى خرج عاهل البلاد بخطاب ناري، لا التقاعد، لا صندوق المقاصة، فيناهوما النتائج الملموسة، بلا هضرة خاوية ولا ّ بكى الـضـفاضع الحاملة؟
الشعبويين كولـــّـهم كايتقـلـــّـدوا مناصب كـبر منهم بكثير، كايمتاهنوا الغش، الخدع، الدجل السياسي أو الإستفزاز، شكون اللي كان كايظن أن ترامب غادي إفوز فى الإستحقاقات الإنتخابية التالية، هاد الكذاب المريض بتضخم الآنا؟ هاد الأمر "غير قابل للنقاش" بالنسبة ألــْـكول واحد كايآمن بحقوق الإنسان، بالديمقراطية ولا ّ عـل ّ الأقل كايتوفر على كامل الأهلية، جهاز المناعة كان معطوب فى هاد المرحلة بحال إنتخابات 7 أكتوبر فى المغرب اللي فضــّـلوا الناخبين إصوّتوا على جلا ّدهم ولا على التغـيير، شنو كان برنامج ترامب بحال جميع الشعبويين؟ أنا هو المخــيــيــّـر، أو إيلا ما ربحتش، "أنننننننننننننننننا" شاك فى هاد الإنتخابات، قبل كاع ما تبدا، بحال الإخوان المغاربة، غير إمــّـا حنا اللوالى ولا ّ كولـــّـشي مزوّر، ما قابلينش! أو هادي هي العقلية الشمولية اللي متشبــّـعين بيها جميع التيارات المحافظة اليمينية المتطرفة.
جميع الشعبويين كايشكــّـلوا خطر على الديمقراطية أو الإنفتاح على الآخر أو العالم لأنهم كايفضلوا إهرّبوا شعوبهم، إلوحـُهم فى قفص القومية العمياء، كانت مصبوغة بصيغة الدين ولا ّ باالـتـعصب، الكراهية، اللي
يمكن لينا نقولوا اليوما هو: ما عمـّـرك تعرف بالضبط شنو بغاوْا الشعبويين ولا ّ شنو كايضور فى موخــّـهم، لأن كذوبهم ما كايدوّخناش غير حنا، ولاكن حتى هوما حتى فقدوا البصلة، القبلة، الفضايح الأخلاقية الأخيرة أحسن دليل.
فاين أمـّـا الكراهية، الحقد، العنصرية غلبات، صرعات الأمل، تطلعات الفرد عرف أن الشعبوية ماشي بعيدة، جميع الشعبويين نموذج واحد: سطحيين، كايستعملوا لغة نابية، كولــّـها قيح، بزق، تكوينهم ضعيف، عزيز عليهم الصخب أو التــّـزباط، حيت ما عندهم علاش إحشموا، مع الأسف ما كايفهموا فى تدبير الشأن العام والو، غير كيفاش إلعبوا على عواطف الطيبين، حتى كايبداوْا يبكيوْا شهارج ديال الدموع قـدّام "الملئ" حبـًا فيهم أو فى الوطن اللي كايغيروا عليه زعما، فى الحقيقة كايبكيوْا غير على الكورسي، الزبود اللي غادي تضيع منهم، من عشيرتهم، السياسة المسؤولة ديال العقلاء، صحاب الكفاءات العالية، ما مبنـيياش على "ماء الشهارج"، العاطفة، ولاكن على أساس متين، على أرقام دقيقة، على برامج واقعية قابلة للتنفيذ، ماشي على أوهام، خرايف! "وللحديث بقية".
