بروفسور في الإنعاش والتخدير ينشر تدوينة مؤلمة عقب مسيرات "الجهل والعار" التي جابت بعض المدن

أخبارنا المغربية : إلهام آيت الحاج

أقدم البروفسور محمد موهاوي، المختص في الإنعاش والتخدير على نشر تدوينة فايسبوكية عبارة عن صرخة ألم بعد مشاهدته لمئات "الجهلة" وهم يخرجون في مسيرات "روحانية" يكبرون خلالها ويهللون غير آبهين بأنهم وفروا ظروفا مثاليا لانتقال عدوى فيروس كورنا وتحطيم كل التحصينات التي جرى بناؤها مؤخرا.

وفيما يلي النص الكامل للتدوينة علها تقرب الناس من المعاناة التي يكابدها جنود وزارة الصحة منذ أزيد من 3 أسابيع:  

"لا هادي هي الضربة القاضية ! لاصافي ساليتو معانا ! عرفتوا أش يجيكم حسن، فاش تساليو التكبير والتلبية والإيمان العميق ديالكم فالسطوحا والزناقي ونتوما مجموعين، كملوا خيركم وأجيوا تخدموا بلاصتنا ! باش يالله أصلا حنا الأساتذة والأطباء والممرضين والأعوان والإداريين نرتاحوا شويا ! وباش يالله أنا شخصيا نخرج من هاد البويٌيت لي حابس فيه راسي في وسط المنزل ديالي هادي كثر من أسبوعين وم قادرش نقرب لوليداتي وهوما حدايا باش مانعاديهومش ! وباش يالله م نمشيوش للسبيطار الصباح ونتا كطبيب راك عارف تقدر تعادا وتقاص وتموت ومع ذلك تتمشي ! وباش متأزمش كل يوم حيت تا تسمع الحالات الخطيرة بداو تايتزادوا وغاديين يموتوا وبنادم في دار غفلون !

الله عز وجل قال لينا ناخدوا بالاسباب ونزيدوا ندعيو، ماشي التفاهة واللامسؤولية ونكملها بالتكبير فالشارع جماعات ! أينكم وعاظ الدولة المبجلين ؟ كولشي مخبي دابا ؟ أش هاد العبث ؟ بغيت غير نفهم زعما هاد الاطباء والممرضين واش بانوا ليكم كراكيز، زعما لهلا يقلب بهم؟

حسبي الله ونعم الوكيل ! كيفاش تقدر تحمٌس الناس وانت أصلا تيدمروك هاد الشردمة".